ekki alveg hætt

21.12.2007 | 22:16

Ég held ég sé alveg að finna mig hérna á bloggsíðunni,- eða þannig... - ætli ég þegi svo ekki þunnu hljóði eitthvað fram eftir nýrri viku, það mætti segja mér það Crying . Það er bara þannig að stundum hefur maður fullt að segja og stundum ekki neitt.

Mig langaði aðeins að segja frá leynivinavikunni okkar. Hún var nefnilega "komin útí tóma vitleysu" eins og sumir orðuðu það, því það var enginn - eða fáir sem höfðu einhverja hrekki í frammi, heldur voru allir bara nokkuð góðir við vini sína og gáfu helst eitthvað matarkyns. Konfekt eða svoleiðis. Einum datt þó í hug að fylla vasa vinar síns af hrísgrjónum og öðrum hugkvæmdist að binda saman allar svunturnar hjá þvottakonunni áður en þær fóru í þvottavélina,- en það eru nú reyndar nokkuð saklausir hrekkir.

Það sem mér fannst hins vegar skemmtilegast var að eftir litlu-jólin borðuðu allir saman og fengu kaffi og rjómabombu og síðan var farið yfir leikinn. Hver og einn sagði frá því sem hann fékk og reyndi að giska á hver hafði verið vinur hans og það var verulega skemmtilegt og þegar ljóst var hver var vinurinn féllust þeir grátandi í faðma... - eða þannig...

Þetta var ekki gert þar sem ég vann síðast, en þar voru reyndar heldur fleiri starfsmenn en hér og það því næstum ógerlegt, nema við hefðum frestað jólunum um sirka einn dag eða svo...

Þetta var gaman,- húrra fyrir leynivinavikum!!!

Flokkur: Bloggar | Facebook

Athugasemdir

Hva...hvað með eggið? Fór eggið ekki í skóinn. Hefði líka mátt setja það í húfu. Örugglega mjög skondið

Þráinn Sigvaldason, 22.12.2007 kl. 10:04

Æ,- ég var ekki alveg viss um að allir hefðu haft húmor fyrir því... og svo hlýt ég bara að vera alltof góðhjörtuð í mér til að hrekkja aðra,- ég verð eitthvað að reyna að æfa mig.

Hulda Brynjólfsdóttir, 22.12.2007 kl. 11:06

Ég skal taka þig á námskeið

Þráinn Sigvaldason, 22.12.2007 kl. 11:54

Það gleymdist að láta mig vita af matnum svo ég var farin heim ég veit ekki hver var minn leynivinur... veist þú það? En þetta var ansi skemmtilegt! Bragi var minn vinur og hann var svo sætur að hann hringdi í mig um kvöldið og þakkaði mér í bak og fyrir, fyrir gjafirnar og sagðist bara aldrei hafa átt svona góðan leynivin það var nú ekki laust við að maður færi bara hjá sér! Hver var þinn vinur??

kveðja, Ásta

Ásta Hrönn , 22.12.2007 kl. 18:26

Takk Þráinn,- mér líst vel á námskeið,- hvenær er fyrsti tíminn???

Já, Ásta,- ég saknaði þín þarna við matinn. Kristín A var leynivinur þinn. Ég var með Eyrúnu og meistari Sigurjón var vinur minn. Ég var aðeins óheppin þegar ég var að giska, því ég sagði að ég hefði grunað hann eða Kolbrúnu, en þegar mér fóru að berast djúpvitrir málshættir, þá hefði ég útilokað Sigurjón (ætlaði að vera svo rosalega fyndin...) en svo var það þá hann. Málið var að málshættirnir voru klipptir út með föndurskærum og rúllaðir upp með dúlleríi, þannig að ég var alveg viss um að kona hefði gert þetta,- en konan hans hafði náttúrulega hjálpað honum.